No sábado 15 de maio percorrrimos a zona de Valpaços, Rafa Vázquez 'Nocko' e mais eu, para mostrarme, en especial, as especies de hérpetos mediterráneos "Lagartija colirroja - Lagartixa-de-dedos-dentados" (Acanthodactylus erythrurus) e "Gallipato - Salamandra-de-costelas-salientes" (Pleurodeles waltl), que xa tiñan citadas noutra visita anterior da Asociación Saramaganta (Anxos Romeo, Martiño Cabana, Rafa Vázquez 'Nocko' e Ricardo Ferreiro). Desta volta atopámonos coa sorpresa de descubrir un exemplar da fermosa "Culebra de herradura - Cobra-de-ferradura" (Hemorrhois hippocrepis), non existindo citas en territorio galego para ningunha destas tres especies.
Na zona tamén é frecuente o "Zimbro" (Juniperus oxycedrus), unha árbore tampouco citada para Galicia e que está tamén aí, ao ladiño mesmo.
Tamén se detectaron outras especies de hérpetos como Píntega común (Salamandra salamandra), Pintafontes verde (Triturus marmoratus), Sapo corriqueiro (Epidalea calamita), Ra verde (Pelophylax perezi), Esgonzo ibérico (Chalcides bedriagae), Escáncer cego (Blanus cinereus), Lagarta rabuda (Psammodromus algirus), Lagarto arnal (Timon lepidus), Cobra de auga viperina (Natrix maura).
En aves observamos e escoitamos, entre outras máis comúns, varios territorios de Picanzo cabecirrubio (Lanius senator), Bubelas (Upupa epops), Papafigos (Oriolus oriolus), dúas Aguias cobreiras (Circaetus gallicus) con piídos en voo paralelo, Abellarucos (Merops apiaster)...